دادگای باڵای فیدڕاڵی ڕۆژی دووشەممەی داهاتووی دیاریكرد بۆ چاوخشاندنەوە بە بەڵگەكانی پەیوەندیدار بە داوای ڕەتكردنەوەی ئەنجامەكانی هەڵبژاردن.
بەپێی میدیا عێراقییەكان، دادگاكە ئەمڕۆ لە دانیشتنێكیدا ڕۆژی 13ی ئەم مانگە دووشەممەی داهاتووی بۆ چاوخشاندنەوە بە نووسراو و بەڵگەكانی پەیوەندیدار بە داوای ڕەتكردنەوەی ئەنجامەكانی هەڵبژاردنی ئەنجومەنی نوێنەرانی عێراق دیاریكردووە.
داواكارییەكە لەلایەن هادی عامری، سەرۆكی هاوپەیمانیی فەتح پێشكەشكراوە، كە یەكێكە لە لایەنە پێكهێنەرەكانی چێوەی هەماهەنگیی شیعەكان.
دانیشتنەكەی ئەمڕۆ بە ئامادەبوونی عامری، ئاڵا تاڵەبانی و ژمارەیەك لە سەركردە شیعییەكان بەڕێوەچوو.
لە 10ی تشرینی یەكەمی ڕابردوو هەڵبژاردنی ئەنجومەنی نوێنەرانی عێراق بەڕێوەچوو، هەفتەی پێشوو ئەنجامی كۆتایی هەڵبژاردنەكە ڕاگەیەندرا، بەڵام بەشێك لە لایەنە شیعییەكان ناڕازین لە ئەنجامەكان و دەڵێن ساختەكاری كراوە، بۆ ئەمەش ڕێگای خۆپیشاندان و دادگاكانیان گرتووەتەبەر.
