دوای هێرشەکەی شەوی ڕابردووی داعش، تیمێکی تۆڕی میدیایی ئێستا بۆ ڕوماڵی هێنانەوەی تەرمی شەهیدەکان گەیشتە بەردەم فریاکەوتنی هەولێر، بەڵام لەلایەن هێزێکی زێرەڤانییەوە قسەی نەشیاو بەرامبەر بە تیمەکە کرا و هەڕەشەی گرتن و ئازاردانیان لێکردن.
دیار حوسێن، پەیامنێری تۆڕی میدیایی ئێستا لە هەولێر لەگەڵ کامێرەمانەکەی هەنگاو غەفور لەلایەن هێزەکەی زێرەڤانییەوە ڕێگریان لێکرا، لەگەڵ ئەوەش دەستبەسەر موبایلەکانیاندا گیرا و پشکنین بۆ موبایلەکانیان کراوە، بەبێ گوێدانە هیچ تایبەتمەندییەکی کەسی.
دیار حوسێن لەسەر ڕووداوەکە دەڵێت، “وەک تیمی تۆڕی میدیای ئێستا دەستمان بەڕووماڵکردن کرد و سەرەتا لە بەردەم ئیمێر جنسی شاری ھەولێر بووین دوای کاتژمێر 3:00 چوینە بەردەم پزیشکی دادی لەھەولێر سەرەتا ھیچ کێشەیەک نەبوو، دواتر کەسێک ھات لە ھێزە ئەمنیەکان و بەقسەی ناخۆش و خۆ توڕەکردن مۆبایلەکانی من و ھاوکارم ھەنگاوی وەرگرت بەبیانوی وێنەگرتن و ئێمەش بۆ ئەوەی دەنگەدەنگ دروست نەکەین پێماندا، ویستم بۆی ڕوون بکەمەوە کە من ھیچ گرتەیەکم تۆمار نەکردوە بێی ئەوەی ھیچ بڵێم وتی (تۆ قسە نەکەی شەڕەفت… ) و بە شەق دەتبەمە دەرەوە.
دیار حوسێن ئاماژە بەوەشدەکات، ئێمەیان بردە دەرەوەی پزیشکی دادی و چووینە پرسگە لەوێ بانگیان کردم بۆچی بەم کاتە لەوێین، مامەڵەیەکیان لەگەڵ کردین وەک ئەوەی ئێمە دووژمنیان بین یەک کاتژمێر ئێمەیان لە سەرما ھێشتەوە و دواتر بانگیان کردین لێکۆڵینەیان لەگەڵ کردین و قوفڵی مۆبایلەکانیان پێکردینەوە بەبێ ڕەچاوکردنی ژیانی تایبەتی ئێمە .
پەیامنێرەکەی تۆڕی میدیایی ئێستا دەشڵێت “بەداخەوە ئەومامەڵەی لەگەڵ ئێمە کرا لەلایەن ھێزە ئەمنیەکانی ئەو شوێنە و لەگەڵ دووژمن ناکرێت بیانوی جیاوزیان دۆزیەوە، بەڵام سەرکەوتوو نەبوون لە تاوانبارکردنی ئێمە و لەکۆتایدا دوای کاتژمێرێک و بەرێکردنی تەرمەکان توانیمان مۆبایلەکان وەربگرینەوە.
