وەزارەتی پێشمەرگەی حکومەتی هەرێمی کوردستان ڕایگەیاند، پێداچوونەوە بە سەنگەرەکانی پێشمەرگەدا دەکرێت و سەنگەرەکان تۆکمەتر دەکرێن.
بڕیارەکەی وەزارەتی پێشمەرگە هاوکاتە لەگەڵ چڕبوونەوەی هێرشی چەکدارانی داعش بۆسەر سەنگەرەکانی پێشمەرگە.
وەزارەتی پێشمەرگە ڕایگەیاندووە، ” لیژنەیەک سەرپەرشتی ڕێکخستنەوە و چاککردنی سەنگەرەکانی بەرگریی لە لیواکانی پێشمەرگە دەکات و لەسەر فەرمانی وەزیری پێشمەرگە، سەرجەم سەنگەرەکانی پێشمەرگە بەشێوازێکی تۆکمەتر و باشتر دادەڕێژنەوە”.
بەپێی زانیارییەکان لیژنەکە دەیەوێت ڕێوشوێنی باشتر بۆ رێگەگرتن لە هەلقۆستنەوەی چەکدارانی داعش بگیرێتەبەر و هەوڵەکان بەگەڕ بخرێن بۆ پاراستنی سەنگەرەکان.
لیوا قارەمان کەمال، جێگری سەرۆکی ئەرکان بۆ ئۆپەڕاسیۆنەکان، لەسەر ڕێکارەکانی وەزارەتەکەی ڕایگەیاندووە، دوای ئەوەی بە بڕیاری وەزیری پێشمەرگە، لیژنەیەک بۆ دووبارە سازدان و ڕێکخستنەوەی سەنگەرەکان پێکهێنرا، لەماوەی چەند رۆژی داهاتوودا، ئەو لیژنەیە دەست بەکارەکانی دەکات و سەرجەم سەنگەرەکانی پێشمەرگە لەتەواوی میحوەرەکان بەسەر دەکاتەوە.
بڕیارە لیژنەکە لە ئەمڕۆوە دەست بەکار ببێت و خاڵە نەرێنی و کەم و کوڕییەکانی سەنگەرەکانی پێشمەرگە دیاری دەکات و دواتر چارەسەر دەکرێن.
