پێكدادانی چەكداری لەنێوان چەكدارانی بزوتنەوەی تاڵیبان و هێزەكانی پاسەوانی سنووری ئێرانی ڕوویدا.
ڕووبەڕووبوونەوەكە ئێوارەی ئەمڕۆ لە ناوچەی كنج كە دەكەوێتە ویلایەتی نیمروز لە باشووری ئەفغانستان و سەر سنووری ئێران بووە.
بەپێی ئەو تۆمارە ڤیدیۆیانەی بڵاوكراونەتەوە لە شەڕەكەدا چەك قورس و سوك لە هەردوولاوە بەكارهێنراوە.
میدیاكان بڵاویانكردەوە، بزوتنەوەی تاڵیبان داوای لە دانیشتوانی ناوچەكە كردووە بەخێرایی ماڵەكانیان چۆڵبكەن، لەهەمان كاتدا پشتیوانیی ئەمنی و سەربازی گەیەندراونەتە ناوچە سنوورییەكان.
بەپێی پێگەكانی سەر بە تاڵیبان لە تۆڕە كۆمەڵایەتییەكان چەكدارانی بزوتنەوەكە دەستیان بەسەر ژمارەیەك خاڵی پشكنینی سەربازی سەر بە پاسەوانی سنووری ئێرانیدا گرتووە.
لە بەرامبەردا ئاژانسی تەسنیم-ی ئێرانی بڵاویكردەوە كە ڕووبەڕووبوونەوەكە بەهۆی “لێكتێنەگەیشتنی سنووری” بووە.
