زۆربەی بەرنامە وەرزشییەكان و ڕۆژنامەنووسە دیارەكان و پێگە ئەلیكترۆنییەكان، ئاماژە بەوە دەدەن لیۆنێل مێسی-ی ئەرجەنتینی براوەی خەڵاتی تۆپی ئاڵتونیی گۆڤاری فرانس فوتبۆڵی فەرەنسییە.
گۆڤاری فرانس فوتبۆڵ ساڵانە خەڵاتی باشترین یاریزانی جیهان دەكات و تۆپێكی ئاڵتونی پێدەبەخشێت.
بۆ ساڵی 2021یش 30 یاریزان ڕكابەری لەسەر دەكەن و 180 ڕۆژنامەنووسی جیهانیش دەنگ دەدەن.
لە دوو ڕۆژی ڕابردوودا ئاشكرابووە، كە مێسی چاوپێكەوتنی لەگەڵ گۆڤارەكە كردووە و وێنەشی لەگەڵ تۆپەكەدا گرتووە.
بە پێی هەواڵە دزەپێكراوەكان، مێسی پلەی یەكەمی بەدەستهێناوە و بنزیمە پلەی دووەم و لیڤاندۆڤیسكیش پلەی سێیەم.
مێسی وەرزی ڕابردوو نازناوی جامی شای ئیسپانیای لەگەڵ بەرشلۆنە بەدەستهێنا و ڕابەرایەتی ئەرجەنتینیشی كرد بۆ بردنەوەی كوپا ئەمریكا.
