زڵاتان ئیبراهیمۆڤیچ-ی سویدی، ئەستێرەی یانەی ئەی سی میلان هۆکاری دواکەوتنی مانچستەر یونایتد لە کاروانی یانە گەورەکان بۆ بیرکردنەوەی ئیدارە و یاریزانانی یانەکە دەگەڕێنێتەوە.
یانەی مانچستەر یونایتد سەردەمێکی سەختی دیکەی لەگەڵ ئولی گۆنار سۆڵشایەری ڕاهێنەری نەرویجیدا تێپەڕاند، ڕاهێنەرەکە دوورخرایەوە و لە ئێستادا مایکڵ کاریک بەشێوەیەکی کاتی پۆستەکەی وەرگرتووە، هاندەران و یاریزانانی یانەکە لە چاوەڕوانی ئیدارەی یانەکەیاندان بۆ دابینکردنی ڕاهێنەرێکی دیکە.
لەبارەی شکستی یونایتدەوە، زڵاتان ئیبراهیمۆڤیچ بە “گاردیان”ی ڕاگەیاندووە، “لە مانچستەر یونایتد بەردەوام باسی ڕابردوو دەکەن، کە چوومە ئەو یانەیە پێموتن: من هاتووم چیرۆکی خۆم لێرە بنووسمەوە، پێویستە بەردەوام بیر لە داهاتوو بکەیتەوە، ئەگەرنا پێویستە بچیتە نەخۆشخانە و کەللـەسەرت پاکبکەیتەوە”.
ئیدارەی مانچستەر یونایتد بەردەوام بەهیوایە سەروەرییەکانی سەردەمی ڕابردوو بگەڕێنێتەوە، ماوەی سێ وەرزە سۆڵشایەر-یان وەک ڕاهێنەر گەڕاندووەتەوە، هەروەها باوەڕیان بە کریستیانۆ ڕۆناڵدۆ هێناوە پەیوەندی بە یانەکەوە بکاتەوە، بەڵام هەرگیز نەیانتوانیوە کێشە تاکتیکییەکانیان چارەسەر بکەن.
لەهەموو ئەوانەش گرنگتر، نەیانتوانیوە شانبەشانی گەورەکانی دیکەی ئەوروپا هەنگاوبنێن، بەردەوام لەسەر بیرۆکەکانی ڕابردوو ژیاون و نوێکارییان لە بیرکردنەوە و فەلسەفەی کارگێڕی و وەرزشییاندا نەکردووە.
