بەهۆی شەڕ و تەقەکردنەوە دوو هاوڵاتی لە شاری هەولێر برینداربوون، هۆکارەکەشی ڕاگرتنی ئۆتۆمبێلە.
ئەمڕۆ هەینی، دەمەقاڵێ لەنێوان شۆفێرێک و چەند دەستگێڕ و کاسبکارێکی شاری هەولێر دروستبوو کە هۆکارەکەی ڕاگرتنی ئۆتۆمبێل بوو، بەپێی زانیارییەکان، ڕووداوەکە بەرەبەیانی ئەمڕۆ لەبەردەم “بازاڕی نیشتمان” ڕوویداوە، کاسبکارەکان ناڕازیبوون لەوەی شۆفێرەکە ئۆتۆمبێلەکەی لەو شوێنەدا ڕابگرێت، بەڵام پێشنیوەڕۆ شۆفێرەکە لەگەڵ چەند کەسێکدا گەڕاوەتەوە بۆ شوێنەکە و تەقەیکردووە.
پەیامنێری تۆڕی میدیایی ئێستا لە هەولێر گواستییەوە، لە شەڕەکەدا دوو کاسبکار برینداربوون کە یەکێکیان بە فیشەک پێکراوە و ئەوی تریان بەهۆی شەڕەدەستەوە برینداربووە.
لە شەوی ڕابردووەوە سێ ڕووداوی تەقەکردن لەناو شاری هەولێر ڕوویانداوە، کە دووانیان بەهۆی ڕاگرتنی ئۆتۆمبێلەوە بوون و دوو هاوڵاتی لەو دوو ڕووداوەدا کوژران و سێی تریش برینداربوون.
