مستەفا كازمی سەرۆك وەزیرانی عێراق ڕایگەیاند، حكومەت توانیویەتی كۆڵەكەكانی سەركەوتن جێگیربكات و بەردەوام دەبێت لە لەناوبردنی داعش.
بەپێی ڕاگەیەندراوی نووسینگەكەی، مستەفا كازمی سەرۆك وەزیرانی عێراق ئەمڕۆ چوارشەممە سەرپەرشتیی كۆبوونەوەی ئەنجومەنی وەزاریی ئاسایشی نیشتمانی كردووە و لە كۆبوونەوەكەدا بارودۆخی ئەمنیی وڵات لە گشت ڕوویەكەوە تاوتوێكراوە.
ڕاگەیەندراوەكە دەڵێت، سەرۆك وەزیران ڕایگەیاندووە، “عێراق بە چەندین ئاڵنگاریدا گوزەردەكات، بەڵام حكومەت توانیویەتی سەرباری كورتیی تەمەنی، كۆڵەكەكانی سەركەوتن جێگیربكات و لەگەڵ پێشهاتە ناوخۆیی و هەرێمییەكاندا مامەڵەبكات”.
كازمی وتوویەتی، “هێزەكانی سوپا و حەشد و پۆلیس و دژەتیرۆر و پێشمەرگە و هەموو جومگەكانی هێزە چەكدارە نیشتمانپەروەرەكان، هێزی گورزوەشێنن لە دوژمنانی وڵات و گروپە تیرۆریستەكان”.
سەرۆك وەزیران جەختیكردووەتەوە لەوەی “تیرۆریستانی داعش دوژمنی یەكەمی عێراقن و هێزە ئەمنییەكان بەردەوامدەبن لە ڕاوەدونانی مۆڵگەكانی تیرۆریستان و خاپووركردنیان لەهەر شوێنێك بن”.
