پۆلیسی بەریتانیا باندێكی دەستگیركرد كە ناسراون بە باندی دزیكردن لە ناوداران.
دەستگیركراوەكان سێ كەسن و ئەندامی ئەو باندەن كە لە ساڵی 2019دا دزییان لە ماڵی چەند كەسایەتییەكی ناوداری بەریتانیا كردووە و میدیاكانی بەریتانیا بە گەورەترین دزیكردنی ڕێكخراو لەو وڵاتە ناوزەدیان دەكەن.
ڕۆژنامەی “میترۆ”ی بەریتانیا بڵاویكردەوە، باندەكە 26 ملیۆن پاوەندیان لە زنجیرەیەك كاری دزیكردندا دزیوە كە بریتیبوون لە دراو و خشڵ و بەردی گرانبەها، هەموو دزیكردنەكانیش لەماوەی 13 ڕۆژی ساڵی 2019دا ئەنجامدراون.
بەشێك لەو كەسایەتییە ناودارانەی باندەكە دزییان لە ماڵەكانیان كردووە، بریتین لە فرانك لامپارد یاریزانی پێشووی یانەی چێڵسی و بەڕێوەبەری یانەكە، ڤیچای سریڤاداناپرابها خاوەنی كۆچكردووی یانەی لیستەر سیتی و تەمارا ئیكلستۆن ژنە ئەكتەر و كریستین پێشكەشكاری ناوداری بەریتانی.
پۆلیسی بەریتانیا دەڵێت، “باندەكە لە چوار كەس پێكهاتووە و سیانیان دەستگیركراون و دانیان بە تاوانەكانی دزیكردندا ناوە و ئاشكرایانكردووە بەنیازی دزیكردن بوون لە بەریتانیا و ماڵی كەسانی ناودار لە وڵاتانی تری ئەوروپا، بەڵام كەسی چوارەم هەڵاتووە بۆ سڕبیا.
ئاماژە بۆ ئەوەش دەكات كە دەستگیركراوەكان سزای زیندانیكردنی 8 – 11 ساڵیان بەسەردا دەسەپێندرێت و داوا لە سڕبیا كراوە كەسی چوارەم ڕادەستی بەریتانیا بكات.
