ناوی چەند کۆچبەرێکی کورد تۆمارکراوە تا بگەڕێنەوە هەرێم

سەرۆکی لیژنەی پەیوەندییەکان و ڕەوەندی کوردستانیی پەرلەمانی کوردستان ‏ئاشكرایکرد، ناوی چەند کۆچبەرێکی کورد لە بیلاڕوسیا تۆمارکراوە، تا ڕۆژی ‏پێنجشەممە بگەڕێندرێنەوە بەغداد.‏

ڕێبوار بابکەیی، سەرۆکی لیژنەی پەیوەندییەکان و ڕەوەندی کوردستانی ڕایگەیاند، “دواى ‏پەیوەندیکردنم بە باڵیۆزی عێراق و نوێنەرایەتیی ھەرێمی کوردستان لە مۆسکۆ ـ ڕوسیا، ‏داوامانکردووە ئەو ماڵباتە کوردانە و گەنجەکانمان، ئەوانەی داوایان کردووە بگەڕێنەوە، ‏ناوەکانیان تۆماربکرێت، بۆ ئەوەی بەر گەشتی ڕۆژی پێنجشەممە بکەون، کە بڕیارە بە ‏فڕۆکە سەرەتا بۆ بەغداد و دواتر بۆ ھەولێر بگەڕێنەوە”.‏

بابکەیی ئاماژەی بەوەشکردووە، “دوای تۆمارکردنی ناوی ماڵباتێکی زاخۆیی بۆ ئەو ‏گەشتە، ھاوکات ناوی ماڵباتێکی ھەولێر و چەندین گەنجی ھەرێمی کوردستان بۆ ئەو ‏گەشتە تۆمارکراوە”.‏

پێشتر وتەبێژی وەزارەتی دەرەوەی عێراق ڕایگەیاندبوو، رۆژی پێنجشەممە یەكەم گەشتی ‏گەڕانەوەی كۆچبەران لە بیلاڕوسیاوە ئەنجام دەدەن.‏

ئەحمەد سەحاف، وتەبێژی وەزارەتی دەرەوەی عێراق لە ڕاگەیەندراوێكدا ئاماژەی ‏بەوەكردووە، 18ی ئەم مانگە یەكەمین گەشت بۆ ئەو كۆچبەرانە ڕێكدەخەن كە بە ویستی ‏خۆیان دەیانەوێت لە سنوورەكانی بیلاڕوسیا و پۆڵەنداوە بگەڕێنەوە.‏

بابەتی پێشتر

 پلاندانانی عێراق: لە ساڵی داهاتوودا سەرژمێریی دانیشتووان ئەنجامدەدەین

بابەتی دواتر

فەرمانبەرانی گرێبەست داوای بەهەمیشەییکردنیان دەکەن و هۆشداری دەدەنە حکومەت

بابەتی پەیوەندیدار