سەركردەیەكی هاوپەیمانیی فەتح دەڵێت، “دەركردنی هێزەكانی ئەمریكا لەمساڵدا بڕیارێكە لێیپاشگەزنابینەوە و ئەمریكا لێكەوتەكانی مانەوەی دەزانێت”.
عودەی خدران یەكێك لە سەركردەكانی فەتح ئەمڕۆ هەینی ڕایگەیاند، “ئەمریكا بەشێكی سەرەكی و گرنگی كێشەكانی عێراقە و هەوڵی لاوازكردنی عێراق و دروستكردنی كێشەی ناوخۆیی دەدات”.
هاوپەیمانیی فەتح كۆكەرەوەی زۆربەی گروپەكانی حەشدی شەعبییە و هادی عامری سەرۆكایەتی دەكات، ماوەی دوو ساڵە هەڕەشە لە هێزەكانی ئەمریكا دەكات لە عێراق بكشێنەوە، بەپێچەوانەوە ڕووبەڕوویان دەبێتەوە.
خدران دەڵێت، “دەركردنی هێزەكانی ئەمریكا لە عێراق لەكۆتایی ئەمساڵدا بڕیارێكە لێیپاشگەزنابینەوە و ئەمریكا لێكەوتەكانی مانەوەی لە عێراق دەزانێت، بەتایبەت لەكاتێكدا بڕیاری دەركردنی ئەمریكا گوزارشت لە هەموو پێكهاتەكانی گەل دەكات”.
بەپێی وتەی ئەو سەركردەیەی فەتح، مانەوەی ئەمریكا بۆ دروستكردنی قەیران و ناسەقامگیركردنی ئاسایشی عێراقە و دەپرسێت، “كێ لەپشت لەدایكبوونی قاعیدە و داعش و ڕێكخراوە تیرۆریستییەكانی ترەوەیە؟ كێ پشتیوانیكردن ؟ ئەمریكا تا ئەم ساتەش پێداویستییەكانی شانە تیرۆریستەكان دەستەبەردەكات”.
