بۆ دوورخستنەوەی هاوڵاتییان لە ڕێگای قاچاخ و نایاسایی، بەڕێوەبەرایەتیی پاسپۆرتی سلێمانی هەڵمەتێكی هاوكاری و ڕێنیشاندان دەربارەی ڕێگا یاساییەكانی كۆچ بۆ وڵاتانی ئەوروپا ڕادەگەیەنێت.
بەڕێوەبەرایەتییەكە لە ئاگادارییەكدا دەڵێت، “لەڕێگەی هەڵمەتێکی میدیاییەوە هاوکار و ڕێنیشاندەری هاوڵاتییانی خۆشەویست دەبین، بۆئەوەی بەڕێگەیەکی یاسایی کۆچ بۆ وڵاتانی ئەوروپا بکەن، نەک ڕێگەی مەرگەسات و قاچاخ و نایاسایی بگرنەبەر”.
پاسپۆرتی سلێمانی دەڵێت، لەڕێگەی پەڕەی تایبەتیی خۆی لە تۆڕی کۆمەڵایەتیی فەیسبووک، ڕێگا یاساییەکانی وەرگرتنی ڤیزای گەشتیاری، ڤیزای کارکردن، ڤیزای نەخۆشی و چەند جۆرێکی دیکە لە ڤیزا بڵاودەکاتەوە.
هاوكات ئامانجی ئەو هەڵمەتە ڕووندەكاتەوە و دەڵێت، بۆ ئەوەیە “هاوڵاتییان بەڕێگایەکی سەلامەت و یاسایی کۆچبکەن، بۆئەوەی خۆیان و خێزانەکانیان دووربن لە مەترسییەکانی ڕێگای کۆچی نایاسایی”.
داواش لەهەر كەسێك دەكات كە “دیمەنەكانی ژن و منداڵ و گەنج و پیرەکانی ڕێگای کۆچ ناخی هەژاندوون، هاوکاربن بۆئەوەی چیتر هاوڵاتییانی کورد لەو ڕێگایە نەبنە قوربانی و ڕێگری لەو نەهامەتییە بکەین”.
