كەشناسیی هەرێم ڕایدەگەیەنێت لە سبەینێوە شەپۆلێكی بارانبارین ڕوو لە شار و ناوچەكانی هەرێمی كوردستان دەكات و بەفریش ناوچە شاخاوییەكان دەگرێتەوە.
بەڕێوبەرایەتی گشتی كەشناسیی و بومەلەرزەزانی هەرێمی كوردستان ئەمڕۆ چوارشەممە 3ی ئازار بڵاویكردەوە، پێشبینى دەکرێ سبەى لە بەرەبەیانەوە لە ناوچەکانى ڕۆژئاوای هەرێم و سنوورى پارێزگای دهۆک و هەولێر بەشێوەی بچڕ بچڕ نمە باران و بارانى مامناوەند دەستپێبکات.
دەشڵێت، لە دوای نیوەڕۆوە مەودای بارانبارینەکە زیاتر دەبێت، بەشێوەى بچڕ بچڕ زۆربەى ناوچەکانى هەرێم دەگرێتەوە بە تایبەت شەوى پێنجشەممە لەسەر هەینى ڕێژەی بارانبارینەکە زیاتر دەبێت و لە هەندێ ناوچەى باشوور و دەوروبەرى پارێزگای سلێمانى هەورە تریشقەشى لەگەڵ دەبێت.
كەشناسی ڕونیشیكردوەتەوە، خێرایی با چالاک دەبێت (20-30)کم/س و بەفریش لە ناوچە شاخاوییەکان دەبارێت.
پێشبینیش دەکرێت ئەم شەپۆلە تا نیوەڕۆی ڕۆژى هەینى بەردەوام بێت، وەك ئەوەی كەشناسیی هەرێم بڵاویكردوەتەوە.
