هەردوو شاندی یەكێتی و بزوتنەوەی گۆڕان كۆبوونەوە و دۆخی دوای هەڵبژاردن و دوا گۆڕانكارییەكانیان تاوتوێكرد.
بەپێی ڕاگەیەندراوی كۆبوونەوەكە، “ئەمڕۆ دووشەمە شاندێكی مەكتەبی سیاسی بە سەرپەرشتیی ڕەفعەت عەبدوڵڵا سەردانی بزوتنەوەی گۆڕانی كرد و لەلایەن بەختیار عومەر و ژمارەیەک لە ئەندامانی جڤاتی نیشتیمانیی بزوتنەوەكەوە پێشوازییان لێكرا”.
ئاماژە بەوەشدراوە، “لەو كۆبوونەوەیەدا، بارودۆخی سیاسی و ئەمنیی عێراق و دوا گۆڕانكارییەكان تاوتوێكران، بەتایبەت ئەو بارودۆخەی دوای هەڵبژاردنی ئەنجومەنی نوێنەرانی عێراق هاتووەتەكایەوە”.
هەروەها جەختكرایەوە لە گرتنەبەری هەموو ئەو ڕێوشوێنانەی كە یەكڕیزی دەپارێزن و لەو چێوەیەشدا مافە دەستوورییەكانی خەڵكی كوردستان بەدیدەهێنن.
هەر بەپێی ڕاگەیەندراوەكە، “تەوەری دووەمی كۆبوونەوەكە، هەڵسەنگاندنی بارودۆخی هەرێمی كوردستان و چاككردنی گوزەرانی هاوڵاتییان بوو، بەتایبەت خۆئامادەكردن بۆ ئەو ئاڵنگارییانەی ڕووبەڕووی هەرێم دەبنەوە لەسەر بنەمای گفتوگۆ و لێكتێگەیشتن و سازان”.
