ناوەندی ڕووبەڕووبوونەوە و چاودێریکردنی نەخۆشییەکانی ئەمریکا – CDC بڕیاری وەرگرتنی ڤاکسینی فایزەر – بایۆنتێکی بۆ منداڵانی تەمەن 5 بۆ 11 ساڵی دا.
ئاژانسی ڕۆیتەرز بڵاویکردەوە، ناوەندی ڕووبەڕووبوونەوە و چاودێریکردنی نەخۆشییەکانی ئەمریکا، دوێنێ سێشەممە ڕەزامەندیی کۆتایی داوە لەبارەی ڤاکسینکردنی منداڵانی تەمەن 5 بۆ 11 ساڵ و لە ئەمڕۆ چوارشەممەوە کوتانی منداڵان دەستپێدەکات.
هەڵمەتی کوتانی منداڵانی تەمەن 5 بۆ 11 ساڵ لە ئەمریکا 28 ملیۆن منداڵ دەگرێتەوە.
ئەو ڤاکسینەی بۆ تەمەنی 5 بۆ 11 ساڵ بەکاردەهێنرێت جۆری فایزەر – بایۆنتێکە و یەک لەسەر سێی ئەو ڤاکسینەیە کە بۆ کەسانی نەوجەوان و پێگەیشتوو بەکاردەهێنرێت.
ئێستا کۆمپانیای فایزەر دەستیکردووە بە ناردنی بڕێکی زۆر لە ژەمە ڤاکسینی تایبەت بۆ ئەو تەمەنە، هەر منداڵێک دوو ژەمی ڤاکسینەکە وەردەگرێت، بە مەرجێک ماوەی نێوان ژەمی یەکەم و دووەم سێ هەفتە بێت.
بەپێی ئەو داتایانەی ناوەندی چاودێریکردن و ڕووبەڕووبوونەوەی نەخۆشییەکان (CDC) بڵاویکردووەتەوە، تائێستا ئەمریکا 542 حاڵەتی گیانلەدەستدانی بە کۆرۆنا لە منداڵاندا تۆمارکردووە، کە تەمەنیان لەخوار 17 ساڵەوە بووە.
