جێگری سەرۆكی پەرلەمانی كوردستان ڕایدەگەیەنێت، گەل و حكومەت و سەرۆككۆمارەكانی فەڕەنسا بەردەوام پشتیوانی گەلی كوردستانیان كردووە و دەشڵێت، هەر هەڵوێستێكی پێچەوانە لە هەر لایەكەوە بوبێت تەعبیر لە ڕای پەرلەمان ناكات.
دوابەدوای سەردانەكەش هێمن هەورامی لە لێدوانێكدا بۆ ڕۆژنامەنوسان ڕایگەیاند، گەل و حكومەت و سەرۆككۆمارەكانی فەڕەنسا بەردەوام پشتیوانی گەلی كوردستانیان كردووە.
وتیشی، سەردانەكەیان هەم بۆ گەیاندنەوەی ڕێز و سوپاس بووە بە گەل و حكومەتی فەڕەنسا، هەم بۆ دەربڕینی پشتیوانیش بۆ هەر هەڵوێستێك كە ئێستا حكومەتی فەرەنسا و ڕای گشتی فەڕەنسا هەیبێت، بۆ ئەوەی ئەم پەیوەندییانە هەبێت”.
جێگری سەرۆكی پەرلەمان ئەوەشی وت، “فەرەنسا تاكە پشتیوانی حەقیقی هەرێمی كوردستان بووە” بۆیە هەر هەڵوێستێك لە هەر پەرلەمانتارێك و لە هەر لایەكەوە بوبێت تەعبیر لە ڕای پەرلەمانی كوردستان ناكات.
دوپاتیشیكردەوە، هەڵوێستی فەرمی پەرلەمان ئەمەیە كە سەرۆكایەتی پەرلەمانی كوردستان و زۆرینەی هەرە زۆری خەڵكی كوردستان لەناو پەرلەمان تەعبیری لێدەكات.
هێمن هەورامی ئەوەشی خستەڕوو، “ئیدانەی هەر جۆرە لێدوان و هەر جۆرە دەربڕینێك دەكەین كە پێكەوە ژیانی ئاینەكان، پێكەوە هەڵكردن لەگەڵ یەكتری و جیاوازی قبوڵكردنی یەكتری نادیدە بگرێت”.
سەردانی ئەو شاندە لەكاتێكدایە ڕۆژی دووشەممە ژمارەیەك لە ئەندامانی پەرلەمانی كوردستان سەبارەت بە بڵاوكردنەوەی كاریكاتێر و لێدوانەكانی ئیمانوێل ماكرۆن،ی سەرۆككۆمار یاداشتی نیگەرانیی 26 پەرلەمانتاریان ڕادەستی كونسوڵی فەڕەنسا لە هەولێر كرد.
