وەزارەتی کارەبای حکومەتی هەرێم ڕایگەیاند، بەهۆی ئەو شەپۆلە با و بارانەوە کە ڕووی لە هەرێمی کوردستان کردووە، دەیان شۆرت لە تۆڕی کارەبای نیشتمانیدا دروستبووە و بەهۆیەوە چەند کاتژمێرێک کارەبا کوژاوەتەوە.
لەسەر شۆرتەکانی کارەبا، وەزارەتی کارەبا ڕایگەیاند، ” هێڵێکی 132کەی ڤی لە پارێزگای سلێمانی کەوتووە و چەند زیانێکی دیکەش بەر هێڵەکانی 11 و 33 کەوتوون، شۆرتی کارەباش لە 41 فیدەری کارەبا لە ناوچە جیاوازەکانی سلێمانی دروست بوون”.
وەزارەتی کارەبا ئاماژەی بەوەکرد، ” بەشی کۆنتڕۆڵی کارەبای هەرێم و پارێزگاکان و تیمەکانی چاککردنەوەی بەڕێوەبەرایەتییەکانی دابەشکردنی کارەبا گرفتەکانیان چارەسەر کردووە و کارەبا لە ماوەیەکی کەمدا ئاسایی بووەتەوە”.
وەزارەتی کارەبا داوای لە هاوڵاتییان کردووە، لەکاتی بارانبارین و هەورە تریشقە خۆیان لە تاوەرەکانی کارەبا بە دوور بگرن کە مەترسی بۆ سەر گیانتان دروست دەکات.
