بەڕێوەبەرایەتیی هاتوچۆی هەولێر ئاگاداری شۆفێران دەکاتەوە لەو ڕووداوانەی کە بەهۆی بارانی یەکەمی پاییز و نەزانینی مامەڵەی شۆفێرانەوە لەگەڵ شەقامەکان ڕوودەدەن و دەڵێت، “یەکەم بارانی پاییز مەترسیدارە”.
لە ڕاگەیەندراوێکدا فازڵ حاجی وتەبێژی بەڕێوەبەرایەتیی هاتوچۆی هەولێر ڕایگەیاند، پاشنیوەڕۆی ئەمڕۆ بەهۆی تەڕبوونی شەقام و تیژڕەوییەوە، ئۆتۆمبێلێکی جۆری هیۆندای تایبەت کۆنترۆڵی لەدەست دا و خۆی کێشا بەتەنیشتی ڕێگا و لەدواییشدا کەوتە ناوڕێڕەوی قەنتەرەی ئاوی باراناو.
لەو ڕووداوەدا شۆفێرەکە و دوو سەرنشین بەسەختی برینداربوون.
هاتوچۆی هەولێر شۆفێران ئاگاداردەکاتەوە کە دەبێت بە زیرەکانە مامەڵە لەگەڵ یەکەم بارانی پاییزدا بکرێت ئەگەرنا “دەبێتە کارەسات”، داوادەکات شۆفێران بەهێمنی شۆفێری بکەن.
