دادگای باڵای دادی بەرازیل لێکۆڵینەوە لە سەرۆکی فیدراسیۆنی تۆپی پێی جیهان، جیانی ئینفانتینۆ دەکات و ئەگەرهەیە سزای قورسی بەسەردا بسەپێنرێت.
ڕۆژنامەی “لاناسیۆن” ئاشکرایکردووە، لە ڕابردوودا هەریەک لە داهێنەران پابلۆ سیلڤا و هاینی ئالیمانی سکاڵایان لەسەر فیفا تۆمارکردووە، تۆمەتی دزینی بیرۆکەی داهێنانیان خستووەتەپاڵ فیدراسیۆنەکە.
بەپێی سەرچاوەکە، دوو داهێنەرەکە داهێنەری “سپرا”ی دیاریکردنی شوێنکاری فاوڵ و لێدانە ڕاستەوخۆکانن، لە ساڵی 2014 ڕیککەوتنیان لەگەڵ خولیۆ گرۆندۆنا و جوسێف سیپ پلاتەر-ی سەرۆکی فیفا کردووە بەبڕی 40 ملیۆن دۆلار بۆ بەکارهێنانی داهێنانەکەیان لەمۆندیالی 2014، بەڵام ڕێککەوتنەکە جێبەجێنەکراوە.
لەئێستادا دادگای باڵای بەرازیل کەیسەکەی زیندووکردووەتەوە، جیانی ئینفانتینۆ تۆمەتبارە بە دزینی بیرۆکەکە و بەکارهێنانی لە مۆندیالی 2018ی ڕووسیا، سەرەڕای ئەوەی لەلایەن دادگاوە هۆشداریی پێدراوە.
لاناسیۆن نووسیویەتی، ئەگەر تۆمەتەکان بەسەر فیفا ساغببێتەوە، ناچاردەبن بڕی 100 ملیۆن دۆلار بە دوو داهێنەرەکە بدەن، هەروەها جیانی ئینفانتینۆ-ی سەرۆک ئەگەری زیندانیکردنی لەنێوان یەک بۆ چوار ساڵدا دەبێت.
