حكومەتی هەرێم ڕایدەگەیەنێت، ئەمڕۆ زیاتر لە 500 هەزار لیتر بەنزین دەگاتە شارەكانی هەرێم و دەشڵێت، لە دوو ڕۆژی ئایندەدا ئەو بڕە بۆ دوو بەرامبەر زیاد دەكات.
فەرمانگەی میدیا و زانیاریی حكومەتی هەرێمی كوردستان ڕایگەیاند، دوای ڕاسپاردەی سەرۆکی حکومەتی هەرێم و هەوڵەکانی وەزارەتی سامانە سروشتییەکان بۆ چارەسەرى کێشەى کەمى بەنزین، ئەمڕۆ بڕی (540) هەزار لیتر بەنزین دەگاتە وێستگەکانی هەر چوار پارێزگای هەرێمی کوردستان.
دەشڵێت، “لە دوو ڕۆژی ئایندەدا ئەو بڕە بۆ دوو بەرامبەر زیاد دەکرێت”.
حكومەتی هەرێم دڵنیاییش دەدات لەوەی “هەموو هەوڵێکی داوە و بەردەوامە لە چارەسەرکردنی ئەم گرفتە”.
لە دوو هەفتەی ڕابردوودا بەهۆی نەناردنی ئەو بڕە بەنزینەی لەلایەن حكومەتی عێراقەوە ڕەوانەی شارەكانی هەرێم دەكرا، نرخی جۆرە جیاوازەكانی ئەو سوتەمەنییە بەرزبوونەوەیەكی بەرچاوی بەخۆیەوە بینی و لە ئاكامیدا ناڕەزایی و بەرزبوونەوەی نرخی دیكەی بەدواداهات.
