پاش پێنج ساڵ بەسەر تەقینەوەكەی ناوچەی كەرادەی بەغداد، مستەفا كازمی دەستگیركردنی تۆمەتبارەكە ڕادەگەیەنێت و دەڵێت، بەرپرس بووە لەو تاوانە و تاوانی دیكە.
مستەفا كازمی، سەرۆك وەزیرانی عێراق لە تویتێكدا ڕایگەیاند، پاش تێپەڕبوونی زیاتر لە پێنج ساڵ بەسەر تاوانی تەقینەوەكەی كەرادە كە ژانی خستە دڵی عێراقییەكان، هێزەكانیان پاش بەدواداچوونی هەواڵگریی ئاڵۆز لە دەرەوەی عێراق توانییان غەزوان زوبەیعی ناسراو بە (ئەبو عوبەیدەی بەغداد) دەستگیربكەن.
كازمی دەڵێت، ئەبو عوبەیدە بەرپرسە لە تاوانەكەی كەڕادە و تاوانی دیكە.
لە 3ی تەمموزی 2016 تەقینەوەیەك لەناو بازاڕێكی گەڕەكی كەڕادەی بەغداد ڕوویدا و بووە هۆی كوژرانی نزیكەی 300 كەس و برینداربوونی 200 كەسی دیكە، جگەلە ڕووخان و سوتانی حەوت باڵەخانە.
پاش تێپەڕبوونی پێنج ساڵ بەسەر تاوانی تەقینەوەكەی كەڕادە كە ژانی خستە دڵی عێراقییەكان، هێزە ئەمنییە قارەمانەكانمان پاش بەدواداچوونێكی ئاڵۆزی هەواڵگری لە دەرەوە، تیرۆریست غەزوان زەوبەعی (ئەبو عوبەیدەی بەغدا) یان دەستگیر كرد، ناوبراو بەرپرسی یەكەمە لەم تاوانە و هەندێك تاوانی تر. pic.twitter.com/Gr6lqNfccN
— Mustafa Al-Kadhimi مصطفى الكاظمي (@MAKadhimi) October 18, 2021
ئاژانسی ئەسۆشیەتد پرێس لەسەر زاری دوو بەرپرسی هەواڵگریی عێراق بڵاویكردەوە، زوبەیعی، بەڕەگەز عێراقییەوە و لە پرۆسەیەكی ورددا بە هەماهەنگی لەگەڵ یەكێك لە وڵاتانی دراوسێ دەستگیركراوە.
تۆمەتبار چەند مانگێكە لەلایەن هەواڵگریی عێراقییەوە لەژێر چاودێری و بەدواداچووندایە.
بەرپرسەكان ئاشكراشیانكرد، زوبەیعی لە وڵاتێكی بیانی دەستگیركراوە، بەڵام ئاماژەیان بە ناوەكەی نەكردووە، بەر لە دوو ڕۆژیش ڕادەستی عێراق كراوەتەوە.
زوبەیعی (29 ساڵ) یەكێك بووە لە ئەندامانی ڕێكخراوی قاعیدە كاتێك لەلایەن هێزەكانی ئەمریكاوە دەستگیركرا و لە زیندانی كرۆپەر بەندكراوە، دواتریش لە ساڵی 2013 لە بەندینخانەی ئەبوغرێب هەڵهات.
لەدوای هەڵهاتنیشی چووە پاڵ ڕێكخراوی داعش تا كاتی دەستگیركردنی لەڕیزەكانی ئەو ڕێكخراوەدا مایەوە.
