ڕوسیا خوازیارە تاڵیبان شكست بە داعش بهێنێت “وەك پێشتر بەڵێنی دابوو”.
حكومەتی ڕوسیا ترسی هەیە لە بەهێزبوونی پێگەی داعش و گروپە توندڕەوەكان لە ئەفغانستان و پەڕینەوەیان بۆ وڵاتەكەی و دروستكردنی پشێوی.
بۆ ڕێگریكردن لەو مەترسییە، ڕوسیا داوا لە بزوتنەوەی تاڵیبان دەكات شەڕی ڕێكخراوی داعش بكات و بەسەریدا زاڵببێت و ئاماژە بۆ ئەوە دەكات كە پێشتر تاڵیبان ئەو بەڵێنەی داوە.
ماریا زاخارۆڤا، وتەبێژی وەزارەتی دەرەوەی ڕوسیا ڕایگەیاند، “ڕوسیا هەست بە دڵەڕاوكێ دەكات چونكە چالاكیی ڕێكخراوی داعش پاشەكشە ناكات”.
ئاماژەی بۆ ئەوەش كرد كە لەپێناو تاوتوێكردنی دۆخەكە و ڕووبەڕووبوونەوەی مەترسییەكاندا، ڕۆژی 20ی ئەم مانگە كۆبوونەوەیەكی نێودەوڵەتی سازدەدرێت كە نوێنەرانی تاڵیبان و چین و ئێران و پاكستان و هندستان بەشداریی تیادا دەكەن.
