لە بۆسەیەكی پاشماوەی چەكدارانی داعش لەنیوان قەزای كفری و ناحیەی سەرقەڵا دوو كەس كوژران و یەكێكی دیكەش برینداربوو.
ئێوارەی ئەمڕۆ ژمارەیەك لە چەكدارانی داعش بۆسەیەكیان لەسەر ڕێگای سەرەكی نێوان قەزای كفری و ناحیەی سەرقەڵا لە گەرمیان نایەوە.
پەیامنێرمان لە ناوچەكەوە پێی ڕاگەیاندین، لەكاتی تێپەڕبوونی ئۆتۆمبێلێكدا بەنێو بۆسەكەدا، چەكدارەكان تەقەیان لێكردووە بەهۆیەوە دوو كەس كوژراون و یەكێكی دیكەش برینداربووە.
ئەوەشی وت، یەكێك لە كوژراوەكان هاوڵاتییەكی كوردە بەناوی (ج.خ.).
دوابەدوای ڕووداوەكەش هێزەكانی ئاسایش و هێزە ئەمنییەكان گەیشتوونەتە ناوچەكە و گەڕان و پشكنینیان بەدوای چەكدارە هێرشبەرەكاندا دەستپێكردووە.
