سەركردەیەكی تاڵیبان ڕایدەگەیەنێت، خاكی ئەفغانستان دژی هیچ وڵاتێك بەكارناهێنن و ئێستا پەیوەندییەكانیان لەگەڵ زۆربەی وڵاتاندا باشە.
هیبەتوڵڵا زادە، سەركردەی تاڵیبان لە ڕاگەیەندراوێكدا ئاماژەی بەوەكردووە، “تاڵیبان پەیوەندییەكانی لەگەڵ تەواوی وڵاتان ئەرێنی و باشن و پابەنددەبێت بە تەواوی یاسا و بڕیارە نێودەوڵەتییەكان بەمەرجێك دژی ئایینی ئیسلام و بنەماكانی نەبێت”.
باسی لەوەشكردووە، دەمانەوێت ئەفغانستانێكی ئارام و سەقامگیر هەبێت و بتوانێت خۆی بژێنێت.
سەركردەكەی تاڵیبان جەختی لەوەشكردووەتەوە، بزوتنەوەكەیان دەیەوێت، پەیوەندییەكی ئەرێنی و باشی لەگەڵ تەواوی وڵاتاندا هەبێت لەسەر بنەمای بەرژەوەندییە باڵاكانی ئەفغانستان.
هیبەتوڵڵا زادە ئەوەشی وتووە، “ئەمارەتی ئیسلامی، چەند هەنگاوێكی جددی و كاریگەر لەبارەی مافی مرۆڤ، مافی كەمینەكان و پێكهاتە پەراوێزخراوەكانەوە دەنێت”.
