پۆلیسی سلێمانی ڕایگەیاند، مەفرەزەکانی بنکەی پۆلیسی ڕزگاری تۆمەتبارێکیان دەستگیرکرد کە تەقەی لە هاوسەرەکەی کردبوو و دواتر هەڵاتبوو.
لە ڕاگەیەندراوێكدا بەڕێوەبەرایەتیی پۆلیسی سلێمانی ئاماژەی بەوەكردووە، “دوای ئەوەی ھێزەکانی پۆلیسی سلێمانی ئاگادارکرانەوە لە ڕووداوێکی تەقەکردن لە سنووری بنکەی پۆلیسی ڕزگاری، دەستبەجێ ھێزەکانی پۆلیس گەیشتنە شوێنی ڕووداوەکە و دەرکەوت کە ئافرەتێک بەفیشەک برینداربووە، دواتر بریندارەکە بۆ نەخۆشخانە گواسترایەوە و لێکۆڵینەوە بۆ دۆزینەوە و دەستگیرکردنی تۆمەتبار دەستیپێکرد”.
پۆلیس باسی لەوەشكردووە، ڕووداوەکە بەهۆی کێشەی خێزانییەوە بووە و بریندارەکەش لە نەخۆشخانەیە و چارەسەری پزیشکی وەردەگرێت و دوای وەرگرتنی بڕیاری دادوەر، هەمان شەو توانرا تۆمەتبار (س، م، م) لەدایکبووی 1976 لەلایەن بنکەی پۆلیسی ڕزگارییەوە دەستگیربکرێت و دەستیشبگیرێت بەسەر دەمانچەکەیدا.
ڕوونیشیكردووەتەوە، لە ئێستادا تۆمەتبارەكە بەبڕیاری دادوەر و بەپێی ماددەی 31/405 لەیاسای سزادانی عێراقی ڕاگیراوە و لێکۆڵینەوە لەگەڵیدا بەردەوامە.
