ئەمرۆ پێنچشەممە 22ی تشرینی یەکەم، پۆلیسی دهۆک، لە ڕاگەیاندراوێكدا رەتیکردەوە “بێڕێزی بەرامبەر هیچ تۆمەتبارێك کرابێت” و کەسوکاری یەکێک لە چالاکوانەکانیش دەڵێن، “هێزەکانی ئەمنی بە دەمامکەوە چوونەتە سەر ماڵەکەیان و دەستگیریان كردووە.”
بەر لە بڵاوبوونەوەی ڕاگەیاندراوەكەی پۆلیسی دهۆك، هاوسەری شڤان سەعید، مامۆستای ئایینی و بەرپرسی ئۆفیسی هاوپەیمانی لە بادینان وتی، “بەیانی ئەمڕۆ هێزێکی ئەمنی بە دەمامکەوە هاتنە سەر ماڵەکەمان و بە جلی نووستنەوە شڤان-یان لەگەڵ خۆیاندا بردووە، دواتر کەلوپەلەکانی ناو ماڵەكەیان تێکداون.”
لە بەرامبەردا پۆلیسی دهۆك لە ڕاگەیاندراوێكدا ڕایگەیاند، “بە فەرمانی دادوەر و بەپێی ماددەی 221 لە یاسای سزادانی عێراقی، پۆلیس و دەزگا ئەمنییەکانی تر بە سەرپەرشتی عەمید- شەعلان ئەحمەد، بەڕێوبەری گشتیی پۆلیسی دهۆک، چەندین تومەتبار دەستبەسەرکراون.”
پۆلیسی دهۆک، لە ڕاگەیاندراوەکەیدا ڕەتیکردەوە “بێڕێزی بەرامبەر هیچ تۆمەتبارێك کرابێت” و وتی، “بە ڕێزگرتنەوە و بەپێی یاسا، ڕەوانەی دادگا کراون و بە جوانترین شێوە سەرەدەریان لە گەڵدا کراوە.”
