بەڕێوبەری نەخۆشخانەی منداڵانی سلێمانی ڕایدەگەیەنێت، توشبوون بە ڤایرۆسی كۆرۆنا لەنێو منداڵاندا لەسەر ئاستی جیهان زیادیكردووە و دەشڵێت، ئێستا توشبوون بە قورسی لەنێو منداڵانی خوار تەمەن یەك ساڵدا هەیە.
وتیشی، “پێشتر كە دەوترا منداڵی خوار تەمەن یەك ساڵ كەمتر مەترسییان لەسەرە، ئێستا ئەوانە مەترسی توشبوونیان بە قورسی زیاترە، منداڵانی تەمەنەكانی سەروتریش توشبوون لەنێویاندا زیادیكردووە و نیشانەشیان هەیە”.
بەڕێوبەری نەخۆشخانەی منداڵان ئەوەشی خستەڕوو، “ناڵێین دۆخەكە زۆر مەترسیدارە، بەڵام خەڵك ئاگاداردەكەینەوە كە منداڵانیش توشدەبن و ڕێژەی توشبوونیان بەرزبووەتەوە و حاڵەتی قورستریشیان تیایە و گیان لەدەستدانیشمان هەیە”.
لە هەمان كاتدا دڵنیایی ئەوەیدا كە ئەو منداڵانەی گیانیان لەدەستداوە نەخۆشی درێژخایەنیان هەبووە وەك نەخۆشییەكانی دڵ و كۆئەندامی هەناسە و كۆئەندامی دەمار.
پشدەر عەبدوڵا ئەوەشی ڕونكردەوە، ئەگەر بە بەراورد وەریبگرین توشبوون لە منداڵاندا بەراورد بە كەسانی گەورە كەمترە و سوكترە، بەڵام ئەگەری قورسی و حاڵەتی ترسناك و مردنیش هەیە.
