سەرچاوە ئەمنییەکان ئاشکرایانکردووە، بەهۆی تەقینەوەیەک لە کاتی بەڕێوەچوونی یادی عاشورادا لە گەڕەکی جیهاد لە بەغداد سێ کەس کوژراون، کە کەسوکاری یەکترن.
بەپێی زانیارییەکان ڕووداوەکە بەهۆی ئاگرگرتنی بۆری غازەوە بووە و دواتر بەهۆی تەشەنە سەندنی تەقیەوەتەوە و سێ کەسی کوشتووە.
ئەو کەسانەی کە گیانیان لە دەستداوە، دوانیان برای یەکترن و ئەوی دیکەیان خاڵۆزایان بووە و بەشداری یادی عاشورایان کردووە.
ساڵانە لە 10ی موحەڕەمەوە پەیڕەوکەرانی ئاینزای شیعە لە جیهاندا یادی کوژرانی “حسێن ی کوڕی عەلی” دەکەنەوە و چەندین ڕێوڕەسمی جیاوازی بۆ بەڕێوەدەبەن.
ئەگەرچی لە عێراق و ئێران هۆشداری درابوو لە قەرەباڵخی یادە ئاینییەکە بەهۆی مەترسی ڤایرۆسی کۆرۆناوە، بەڵام هاوشێوەی ساڵانی پێشووتر شیعەکان یادی عاشورایان کردەوە.
