لە هەوڵێكیدا بۆ ڕێگریكردن لە تێپەڕبوونی كۆچبەران بەناو خاكی ولاتەكەیدا، حكومهتى پۆڵەندا نیازی خۆی بۆ بونیادنانی دیوارێكی تەلبەند لەسەر سنوورەكانی لەگەڵ بیلاڕوسیا نیشاندا كه بەرزیی دیوارە تەلبەندەكە 2.5 مەتر دەبێت.
پۆڵەندا و لیتوانیا ترسیان لە تێپەڕبوونی كۆچبەران لەڕێی بیلاڕوسیاوە هەیە، كە پێشتر وڵاتەكە ئاشكرایكردبوو ڕێگرییان لێناكات ئەگەر بیانەوێت سنوورەكەی تێبپەڕێنن.
ماریۆس بلاشتشاك، وەزیری بەرگریی پۆڵەندا دوێنێ لە تویتێكدا ڕایگەیاند، بڕیارە ژمارەیەكی زیاتری سەربازان ئەركی پاراستنی ئاسایش لەسەر سنوور بگرنەدەست.
بە كردەییش 900 سەرباز بەدرێژایی سنووری وڵاتەكە لەگەڵ بیلاڕوسیا كە 418 كیلۆمەترە بڵاوهپێكراون.
لە كۆتاییەكانی ئایاری ڕابردوو ئەلیكساندەر لۆكاشینكۆ، سەرۆكی بیلاڕوسیا ڕایگەیاند، وڵاتەكەی ڕێگری لەو كۆچبەرانە ناكات كە دەیانەوێت گەشت بۆ یەكێتیی ئەوروپا بكەن، وەك كاردانەوەیەك بەرامبەر توندكردنی سزاكانی سەر وڵاتەكەی لەلایەن ڕۆژئاواوە.
لیتوانیا -بەتایبەتی- لەوكاتەوە بەدەست شەپۆلی كۆچبەران لە ڕۆژهەڵاتی ناوەڕاستەوە و لەڕێی سنوورەكانی لەگەڵ بیلاڕوسیا دەناڵێنێت، بەمدواییەش فشارەكان بۆسەر پۆڵەندا زیادیانكردووە.
س: DW
