پۆلیسی دارستانی سلێمانی ڕایگەیاند، بەهۆی خەمساردیی هەندێک لە هاوڵاتییان و گەشتیاران ڕووداوەکانی ئاگرکەوتنەوە ڕوویان لە زیادبوون کردووە و بەوهۆیەوە 100 داری سروشتی لە قەزای دوکان سووتاون.
بەپێی ڕاگەیەندراوێکی پۆلیسی دارستانی سلێمانی، بەهۆی ئاگرێکەوە کە دوو ڕۆژ پێش ئێستا کەوتەوە لە قەزاى دوکان 20 دۆنم پوش و پاوان و 100 دارى سروشتى سووتاون.”
پۆلیسی دارستان هۆکاری ئاگرکەوتنەوەکەی بەهۆکارێکى نادیار ناوهێناوە و دەڵێت، “ئاگر لە بەشێکى دارستانەکانى ناوچەی گەشتیاریى قەشقۆڵى لە قەزاى دوکان کەوتەوە دەستبەجێ مەفرەزەیەکى بەشى پۆلیسى دارستان و ژینگەى دوکان گەیشتە شوێنى ڕووداوەکە بەمەبەستى کوژاندەوەى ئاگرەکە، پاشان بەهاوکاریى پۆلیسى بەرگرىی شارستانى و ئاگرکوژێنەوە و هاوڵاتییانى ناوچەکە توانرا ئاگرەکە لەماوەیەکى کەمدا کۆنترۆڵ بکرێت .”
پۆلیسی دارستانی سلێمانی ئاماژەی بەوەشکردووە، لێکۆڵینەوە بەردەوامە لەدەستنیشانکردنی هۆکار و ئەو کەسەی بووەتە هۆکاری ئاگرەکە، کە بووەتەهۆی سووتانی 20 دۆنم پوش و پاوان و سووتانی 100 داری سروشتی.
