ئەستێرەی هەڵکشاوی یانەی بەرشلۆنە، یوسف دیمیر بۆ یەکەمجار لە خولی پلە یەکی ئیسپانیا لەلایەن ڕۆناڵد کومانەوە بەشداریپێکرا و بەبێ ئەوەی تۆپ بەر پێیەکانی بکەوێت توانی ڕیکۆردێکی گرنگ تۆماربکات.
دیمیر لە تەمەنی 18 ساڵ و 80 ڕۆژدا لە ڕوبەڕوبوونەوەیەکی فەرميی بارسا لە خولی پلە یەکی ئیسپانیا بەشداريکرد، بەوەش بووە گەنجترین یاریزانی بیانی بەدرێسی یانەی بەرشلۆنەوە دەردەکەوێت، لە دوای مێسی (17 ساڵ و 114 ڕۆژ).
بەهرەدارەکە لە پێگەی هێرشبەری باڵی چەپ یاریدەکات و پێی چەپی کاریگەرە، لە شێوازی یاریکردندا هاوشێوەی لیۆ مێسی-یە، لەم بارەیەوە جێرارد پیکێ دەڵێت، ” شێوازی خلکردنەوەی تۆپی هاوشێوەی مێسی-یە”.
یاریزانەکە بۆ هەڵبژاردەی نەمسا یاریدەکات، فیدراسیۆنی تۆپی پێی تورکیاش هەوڵی زۆریانداوە بە هەڵبژاردەی تورکیای قایلبکەن، بەڵام یاریزانەکە سەرنجی لەسەر بەرشلۆنەیە و شارەزایان پێیانوایە داهاتوویەکی پرشنگداری دەبێت.
