بەهۆی دەمەقاڵێیەکەوە لەنێوان کوردەکان و تورکەکانی شاری نەغەدە دوو گەنجی کورد کوژران، حزبەکانی ڕۆژهەڵاتیش دەڵێن، “دەبێت هەردوولا ئاگادار و چاوکراوە بن”.
ناوەندی هاوکاریی حزبەکانی ڕۆژهەڵاتی کوردستان لەبارەی ڕووداوەکەوە لە ڕاگەیەندراوێکدا دەڵێن، “بە لەبەرچاوگرتنی ئەو ڕاستییەی هەردوو نەتەوەی کورد و تورک بە درێژایی مێژوو لە شاری نەغەدە پێکەوە ژیاون، دەبێت لە هەموو بارودۆخێکدا هەستی پێکەوەژیان و هەڵکردنیان لە سەرەوەی هەموو شتێک بێت و ئیزن نەدەن لەسەر چەند شتی بێمایە و بەرژەوەندیی چەند کەسی نابەرپرسیار کێشە بکەوێتە نێوان دانیشتووانی ئەم شارەوە. ئەزموونی پێکەوەژیانی ئەم دوو نەتەوەیە ئەوەمان پێدەڵێت ڕێگای چارەسەرکردنی کێشەکان تەنیا بە دیالۆگ، پێکەوەهەڵکردن و لەیەکتێگەیشتنە.”
لە ڕاگەیەندراوی حزبەکانی ڕۆژهەڵاتی کوردستان-دا هاتووە، “دڵخۆشین زانیارییەکان ئەوەمان پێدەڵێن لە هەردوو نەتەوەی تورک و کورد کەسانێکی دڵسۆز و بەپەرۆش بۆ ئاسایش و پاراستنی هێمنیی شار و هێورکردنەوەی ئەو دۆخە نەخوازراوە لە هەوڵێکی جددیدان و ئەوە مایەی دڵخۆشییە بۆ هەموو لایەک، وێڕای دەستخۆشی و ڕێز و پێزانینمان بۆ ئەو هەوڵە بەرپرسیارانەیان، هیوادارین کۆمەڵانی خەڵکی شاری نەغەدە پێشوازی لەو هەوڵە مرۆڤدۆستانەیە بکەن و ئیزن نەدەن کەسانی ئاژاوەگێڕ ژینگەیان نائارام بکەن”.
دوێنێ 7ی ئاب بەهۆی دروستبوونی ناکۆکی لەنێوان چەند کورد و تورکێکدا لە شاری نەغەدە دوو کورد بە ناوەکانی “فەردین ئیبراهیمی” و “محەممەد عەلیزادە” کوژران.
نەغەدە یەکێکە لە شارەکانی سەر بە پارێزگای ئورمێ لە ڕۆژهەڵاتی کوردستان و هەردوو نەتەوەی کورد و تورکی تیادا دەژین، شارەکە 27 کیلۆمەتر لە باشووری ڕۆژهەڵاتی شنۆ-وە دوورە و سەدان ساڵە کورد و تورک لە شارەکەدا بە هاوبەشی ژیاون.
