حكومەتی هەرێم ڕایدەگەیەنێت، بەکارهێنان و بە کرێدانی موڵکی میری زۆر باو و یاساییە و دەشڵێت، بەردەوام دەبێت لە چاكسازی و گەڕاندنەوەی ئەو موڵك و ماڵە گشتییەی بەهەدەردراون.
فەرمانگەی میدیا و زانیاریی حكومەتی هەرێمی كوردستان ڕونكردنەوەیەكی بڵاوكردەوە و تیایدا دەڵێت، ئەمڕۆ لە سایتی تۆڕی میدیای ڕووداودا هەواڵێک لەبارەی بەکرێدانی هەندێ نەمامگەی حکومی بڵاوکراوەتەوە کە “ئاوێتەی چەواشەکاری کراوە و دەستەواژەی نابەجێ و ناپرۆفیشنالانەیان تێدا بەکارهێناوە”.
تیاشیدا هاتووە، “ئەم هەواڵە کە گوایە لەبارەی لێدوانی حیزبێک دارێژراوە هەر لە مانشێتەکەیەوە بە مەبەستی بەلاڕێدابردنی ڕای گشتی بەرامبەر بە حکومەتی هەرێم سازکراوە و لە ناونیشانی هەواڵەکەدا بەکرێدانی نەمامگە بە خیانەتی نیشتیمانی پێناسەکراوە”.
ئاماژەشدەدات، هەم بۆ ئەو کەناڵە و، هەم بۆ ئەو حیزبە ڕوونیدەکەینەوە کە بەکارهێنان و بە کرێدانی موڵکی میری زۆر باو و یاساییە و لە بەرامبەردا بەکارهێنانی دەستەواژەی خیانەتی نیشتیمانی تۆمەتێکی قورسە و پێویستە ئامادەبن بەرپرسیاریەتی ئەم تۆمەتهەڵبەستنانە هەڵگرن.
دوپاتیشیدەكاتەوە، “حکومەت بەردەوام دەبێت لە چاکسازی و ڕێگریکردن لە گەندەڵی و گەڕاندنەوەی ئەو هەموو موڵک و ماڵە گشتیەی بە هەدەردراون” دەشڵێت، “بێگومان کەسانێک بە پڕۆسەی چاکسازی سەغلەتن و هەوڵی ئەو جۆرە چەواشەکارییانە دەدەن، بەڵام هەموو ئەم هەوڵانە لە بەرامبەر ئیرادەی چاکسازیدا مایەپوچ دەردەچن”.
پێشتر وەزارەتی كشتوكاڵی هەرێم بڕیاریدا لەبەر نەبوونی بودجە بەشێك لە نەمامگەكانی بداتە كەرتی تایبەت و، لە بەرامبەردا سەرۆكی پارتی سەوزی كوردستان لە بەرنامەیەكی ئەو كەناڵەدا بڕیارەكەی بە “خیانەتێکی نیشتمانییە و مەترسیدار” ناوبردبوو.
