موقتەدا سەدر ڕێبەری ڕەوتی سەدر بەشدارینەكردنی لە هەڵبژاردنی پێشوەختەی پەرلەمانی عێراق ڕاگەیاند، پشتگیریكردنی خۆشی لە هەموو ئەوانە كشاندەوە كە لە حكومەتی ئێستا و ئایندەدا سەر بە ڕەوتەكەن.
كەمێك پێش ئێستا موقتەدا سەدر وتارێكی پێشكەشكرد، ڕایگەیاند، بەشداریی هەڵبژاردنی پێشوەختەی پەرلەمانی عێراق ناكات، بەڵام هیوایخواست هەڵبژاردنەكە سەركەوتوو بێت و كاندیدی باش دەربچن.
سەدر پشتگیریی خۆشی لە حكومەتەكانی ئێستا و ئایندە كشاندەوە و ڕایگەیاند، دەستی لە پشتگیریكردنی خۆی بۆ هەموو ئەوانە كشاندەوە كە “لە حكومەتەكانی ئێستا و داهاتوودا بانگەشەی ئەوە دەكەن سەر بە ڕەوتەكەن”، داوای دوورخستنەوەی گەندەڵكارانیشی كرد.
ڕێبەری ڕەوتی سەدر هۆشداریشی لە دۆخی عێراق دا، بەوەی هاوشێوەی سوریا و ئەفغانستانی لێبێت، پێشیوایە، ئەوەی لە عێراق ڕوودەدات دەستی دەرەكی لەپشتە.
