ئیدارەی ئەمریکا ئەمڕۆ هەینی هەڵگرتنی سزای ئابوریی لەسەر سێ هاوڵاتیی ئێرانی ڕاگەیاند و وەزارەتی گەنجینەی ئەو وڵاتەش ڕەتیدەکاتەوە لەچوارچێوەی دانوستانەکانی ڤیەننا بێت.
وەزارەتی گەنجینەی ئەمریکا لە ڕاگەیەندراوێکدا ئاشکرایکرد، ئەو ڕێکارانە سێ هاوڵاتیی ئێرانی گرتووەتەوە بە ناوەکانی بێهزاد دانێل میهرزاد، مانوێل فیردەوس و محەمەد ڕەزا دزفۆلیان، کەسی سێیەمییان دوو گەڕی سزاکانی ئەمریکای بەسەردا سەپێنراوە.
وتەبێژی وەزارەتی گەنجینەی ئەمریکا ڕەتیکردەوە ڕێکارەکانی هەڵگرتنی سزاکانی ئەمریکا لەسەر ئەو سێ هاوڵاتییە ئێرانییە و دەرهێنانیان لە لیستی سزاکانی ئەمریکا هیچ پەیوەندییەکی بە دانوستانەکانی ئێستای ڤیەنناوە هەبێت.
جەختیشیکردەوە، هەڵگرتنی ئەو سزایانە بەمانای پێچەوانە بوونەوە یان گۆرانکاری لە سیاسەتی ئیدارەی جۆ بایدن نایەت بەرامبەر ئێران.
