شەوی ڕابردوو بەهۆی تەقینەوەی بوتڵی غازەوە لە ناوچەی پیشەسازی شاری سەقز، کەسێک گیانی لە دەستدا و 10 کەسی دیکە بریندار بوون.
سەرچاوەیەک لە شاری سەقزەوە بۆ تۆڕی میدیایی ئێستا پشتڕاستیکردەوە، کە تەقینەوەکە لە (کارگەی پلاستیک و نایلۆن) لە ناوچەی پیشەسازی شارەکە ڕوویداوە و بەهۆیەوە 10 کەس گەیەندراونەتە نەخۆشخانە، ئەوە سەرەڕای گیان لە دەستدانی کەسێک.
بەرگری شارستانیی سەقز، بە ئاژانسی هەواڵی ئیرنای ڕاگەیاندووە، “دۆخی8 کەس لە بریندارەکان جێگیرە و چارەسەری تەندروستیان وەرگرتووە، بەڵام دوو لە بریندارەکان تەندروستیان جێگیر نییە”.
بە وتەی بەرگری شارستانیی سەقز، هۆکاری تەقینەوەکە لێچوونی غاز بووە و پاشان کۆبوونەوەی لەو شوێنەدا، بۆیە لەکاتی لە دوورەوە ئاگر گەیشتووەتە بوتڵی غازەکە و تەقووەتەوە، ئەوەشی ئاشکراکردووە کە هەموو قوربانییەکانی ڕوداوەکە پیاون.
ئەگەرچی زۆرینەی ناوچەکانی ڕۆژهەڵاتی کوردستان لولەی غازیان هەیە، بەڵام غازەکە بۆ کاری پیشەسازی بەکارناهێنرێت و بە ناچاری بوتڵی غاز بۆ ئەو کارانە بەکاردەهێنرێت.
