فەرماندەی هێزەکانی سوریای دیموکرات، داواکارییەک ئاڕاستەی وڵاتانی ئەندام لە هاوپەیمانیی نێودەوڵەتی دژی داعش دەکات و دەڵێت، هیوادارن ئەو هەزاران ژن و منداڵەی پاشماوەی داعش لە کامپەکانن، لەبیرنەکرێن.
مەزڵوم عەبدی، فەرماندەی هێزەکانی سوریای دیموکرات – هەسەدە لە تویتەری خۆی پەیامێكی بڵاوكردەوە و نوسیویەتی، “هاوپەیمانیی نێودەوڵەتی دژی داعش کۆدەبێتەوە، بەڵام نابێت ئەوە لەبیربکەین، کە هەزاران ژن و منداڵ و چەکداری داعش لە کامپەکانی ژێر دەسەڵاتی هەسەدە ماونەتەوە”.
عەبدی دەڵێت، “داوا لە هاوپەیمانانی دژی داعش دەکەین، هاوکاربن لە گەڕانەوەی ئەو کەسانە بۆ وڵاتەکانی خۆیان، هەروەها هاوکاریی مادی و مەعنەوی ڕۆژئاوای كوردستان بکەن، بۆ تێپەڕاندن و پاککردنەوەی بیری توندڕەوی”.
بە پێی وتەکانی مەزڵوم عەبدی، ڕۆژئاوا پێویستی بەهاوکاریی زیاتری هاوپەیمانانە بۆ بونیادنانەوە و بوژاندنەوەی ناوچە ئازادکراوەکانی دەستی داعش.
ماوەی زیاتر لە ساڵێکە ئیدارەی خۆسەر لە ڕۆژئاوا، داوا دەکات وڵاتان هاوڵاتییانی خۆیان لە کامپی هۆل ببەنەوە و باری سەرشانی ڕۆژئاوا و هێزە ئەمنییەکان سووک بکەن.
The anti-ISIS Coalition will meet tomorrow to discuss progress towards the enduring defeat of ISIS. To ensure sustainable victory, we must not forget that tens of thousands of women, children, and ISIS fighters remain in SDF-NES IDP camps and detention centers.
— Mazloum Abdî مظلوم عبدي (@MazloumAbdi) June 27, 2021
لەناو کامپی هۆلدا زیاتر لە 70 هەزار ژن و منداڵی چەکدارانی داعش دەژین، ئەو کەسانە خەڵکی زیاتر لە 50 وڵاتی جیهانن، تائێستا بەهۆی زۆرییانەوە نەتوانراوە جیابکرێنەوە و منداڵەکانیان دابماڵرێن لە فکری توندڕەوی.
