کاردانەوە نێودەوڵەتییەکان سەبارەت بە پەسەندکردنی سزای بەندکراوانی بادینان بەردەوامە و باڵیۆزی یەکێتیی ئەوروپا لە عێراق بڕیارەکە بە ڕێکارێکی نایاسایی و دوور لە مافی مرۆڤ ناودەهێنێت.
مارتین هوس، باڵیۆزی یەکێتیی ئەوروپا لە عێراق، لەبارەی پەسەندکردنی سزای بەندکراوانی بادینانەوە ڕایگەیاند، “نیگەران بووم لە ئەو بڕیارەی ئەمڕۆ دەرچوو لەلایەن دادگای هەولێر و جەخت لەسەر ئەوە کراوەتەوە ئەو پێنج ڕۆژنامەنووس و چالاکوانانە 6 ساڵ بەند دەکرێن، سەرەڕای ئەو ڕێکارە ناڕاست و ناتەندروستەی بەرامبەریان کراوە، کە لەلایەن نەتەوە یەكگرتووەکانەوە ئاماژەی پێکراوە”.
باڵیۆزی یەکێتیی ئەوروپا لە عێراق ڕاشیگەیاندووە، ”مافی ڕا دەربڕین و مافی ڕۆژنامەوانی و هەروەها دادگایەکی سەربەخۆ، یەکێکە لە مافە بنچینەیی و سەرەتاییەکان لە کۆمەڵگە دیموکراتەکاندا”.
بڕیاری ئەمرۆ دەرچوو لە لایانی مەحکەمەی هەولێر و جەخت لە سەر ئەوە کرا لەسەر ئەو پێنج ڕۆژنامەنووسان و چالاکوان ٦ ساڵ سجن دەکرێن، کە لەمانگی پێنج ٥ دەست گیر کراون. سەرەڕای ئەجرائاتی نا ڕاست و ناتەندروستەی کە برامبەریان کراوە کە لەلایان نەتەوە یەگرتوەکان ئاماژەی پێ کراوە.
— Martin Huth 🇪🇺 🇮🇶 (@EUAmbIraq) June 27, 2021
ئەمڕۆ دادگای پێداچوونەوە بڕیاری سزای زیندانیكردنی چالاكوانانی پەسەندكرد، لەكاتێكدا چاوەڕوان دەكرا بڕیارەكە لە بەرژەوەندی چالاكوانان دەربچێت.
دوای تۆماركردنی داوا یاسایی پارێزەرانی چالاكوانان تایبەت بە ڕاستكردنەوەی بڕیاری دادگای پێداچوونەوە دەربارەی بڕیاری سزادانی پێنج لە ڕۆژنامەنووس و چالاكوانانی بادینان، لە 3ی ئەم مانگە دۆسیەكە ئاراستەی دادگای پێداچوونەوە كرایەوە بەمەبەستی ڕاستكردنەوەی بڕیاری پێداچوونەوەكە.
چاوەڕوان دەكرا لەلایەن دادگاوە سزای چالاكوانان هەڵبگیرێت یان سوك بكرێت، بەڵام دادگا دووبارە سزاكەی وەك خۆی پەسەندكرد.
