ئەستێرە و هێرشبەری هەڵبژاردەی فەرەنسا و یانەی بەرشلۆنە، ئەنتوان گریزمان بە شانوباڵی دیدێر دیشامپی ڕاهێنەردا هەڵدەدات و دەڵێت، “دەزانێت لە چ پێگەیەکدا یاریم پێدەکات”.
لەبارەی تۆمارکردنی گۆڵی یەکەمی لێس بلوس و شێوازی یاریکردنی لە پێکهاتەی دیدێر دیشامپ، گریزمان پەیامێکی ناڕاستەوخۆی ئاڕاستەی ڕۆناڵد کومانی ڕاهێنەری یانەی بەرشلۆنە کرد و ڕایگەیاند، ” لەگەڵ هەڵبژاردەی وڵاتەکەم هەستێکی ناوازەم هەیە، ڕاهێنەر دەزانێت لە کوێدا یاریم پێدەکات و منیش ئەو چانسەم قۆستۆتەوە و دەزانم بە چ شێوەیەک لە پێگەکەمەوە جموجۆڵ دەکەم، لەوەش گرنگتر متمانەی ڕاهێنەر و هاوڕێکانمە بە تواناکانم”.
هەروەها دەڵێت، ” ئەو گۆڵەی تۆمارم کرد یەکێکە لە جوانترین گۆڵەکان لە تەمەنی وەرزشیمدا، هەموو وزەی خۆم بۆ لێدانی تۆپەکە تەرخانکرد، بەهێزبوو، تەنانەت دەکرا بۆ دەرەوەی گۆڵ بڕوات”.
ڕۆژنامە ئیسپانییەکان پێیان وایە وەڵامەکانی “گریزۆ” پەیامێکی ئاشکرایە بۆ ڕۆناڵد کومانی ڕاهێنەری یانەی بەرشلۆنە، تیایدا داوای لێدەکات گۆڕانکاری لە پێگەکەیدا بکات بەو شێوەیەی لە فەرەنسا یاری پێدەکرێت، تاوەکو لە خولی ئیسپانیا لە ڕیزبەندی باشترینەکاندا جێگەی خۆی بکاتەوە.
