ئالان حەمەسەعید، وەزیری پەروەردەی حکومەتی هەرێمی کوردستان ئەمڕۆ دووشەممە ڕایگەیاند، “خوێندنی ناوپۆل بەردەوام دەبێت و هەوڵدەدەین لە پلانێکی ورد و ستراتیژیدا قەرەبووی ئەو بابەتانە بکەینەوە، کە بەهۆی دۆخی کۆرۆناوە فەوتاون”.
لە وتەیەکیدا لە میانی بەشداریکردنی لە کۆنفرانسی نێودەوڵەتی پەروەردە و فێرکردن، ئالان حەمەسەعید وتی، “لە ساڵ و نیوێکی ڕابردوودا لە تەواوی جیهاندا زیاتر لە یەک ملیار و 600 هەزار قوتابی لە خوێندن دابڕان بەهۆی کۆرۆناوە، کە ئەمە گەورەترین شۆک و تەنگژەبوو بۆ پرۆسەی خوێندن لە مێژووی جیهاندا”.
باسیلەوەکرد، کۆرۆنا چوارچێوە کلاسیکییەکەی پرۆسەی خوێندنی گۆڕی و گۆڕانکارییەکە دەوام و کار و ئەرکی خوێندکار و مامۆستایانیشی گرتەوە، لەسەر ئاستی جیهان بە شێوە و ئاستی جیاواز پەنابرا بۆ خوێندن لەدوورەوە (خوێندنی ئەلکترۆنی و ئۆنلاین) وەک جێگرەوەیەک بۆ خوێندنی ناوپۆل.
وەزیری پەروەردە ئاماژەی بەوەکرد، لە 16ی نیسانەوە بەتەواوی خوێندنی ئۆنلاین کاریپێکراوە، لە دوێنێشەوە پرۆسەی خوێندنی ناوپۆل دەستیپێکردەوە و تا کۆتایی ساڵی خوێندنیش بەردەوام دەبێت، ماوەی مانگێک پرۆسەی خوێندنی ناوپۆل بەشێوەی نۆرە (تناوب) بەردەوام دەبێت و هەفتەیەک بۆ دوو هەفتەش بۆ پرۆسەی تاقیکردنەوەکان دەبێت.
سەبارەت بە ئەنجامی تاقیکردنەوە و چارەنووسی خوێندکاران وتی، “ئەوەی پەیوەستە بە دەرچوون و دەرنەچوونی خوێندکار، تەنها مامۆستایان خۆیان بەرپرسیارن، ئەوان پرسیار دادەنێن و نمرەش دیاریدەکەن، نەک ئێمە و هیچ کەسێک ناتوانێت دەستبخاتە ئەو پرۆسەیەوە”.
جەختیکردەوە، دایکان و باوکان دەتوانن دڵنیابن لەوەی منداڵەکانیان لەدەستێکی ئەمیندان بۆ پرۆسەی خوێندن و پەروەردە و بەدڵنیایی خوێندنی ساڵی 2020-2021 بەسەرکەوتووی تەواودەکرێت.
وەزیری پەروەردە لەبارەی مامۆستایانی وانەبێژیشەوە قسەیكرد، وتی، “ئێمە وەک وەزارەت چەند لە تواناماندا بێت پاڵپشتییان دەکەین، ساڵی ڕابردوو بۆ مانگەکانی سێ، چوار و پێنج، کە دەوام نەکراوە شایستەکانیان خەرجکراوە، ئەمساڵی خوێندنیش لە مانگەکانی 10، 11 و 12 دەوامی قوتابخانەکان نەبووە و شایستەی مامۆستایانی وانەبێژ خەرجکراوە، سەرۆک وەزیرانیش بڕیاریداوە ئەوانی دیکەیان بەپێی توانا بۆ خەرجبکرێت”.
