بۆ دەربڕینی ناڕەزایی بەرامبەر بەردەوامیی لێبڕینی موچە و گرانیی شمەك و خۆراك، گردبوونەوەیەك لە سلێمانی بەڕێوەچو و تیایدا یاداشتێك ئاراستەی حكومەتی خۆجێیی كرا.
خۆپیشاندانەكە ئەمڕۆ شەممە لەلایەن كادر و لایەنگرانی حزبی شیوعی كوردستانەوە لە بەردەم بینای پارێزگای سلێمانی ئەنجامدرا، یاداشتێك لەڕێی پارێزگارەوە ئاراستەی حكومەتی هەرێم كرا.
لە یاداشتەكەدا هاتووە، “ناڕەزایی خۆمان دەردەبڕین لە دۆخی خراپی ئابوریی خەڵك و لێبڕینی موچە و گرانبوونی نرخی پێداویستییە ڕۆژانەكانی خەڵك، وەك سوتەمەنی و خۆراك”.
هەر لە یاداشتەكەی كادر و لایەنگرانی حزبی شیوعیدا هاتووە، “موچەی تەواو مافی ڕەوا و یاسایی موچەخۆرانە و، كۆنتڕۆڵكردنی بازاڕ و هەرزانی، مافێكی ڕەوای خەڵكی هەژار و زەحمەتكێشە”.
بەشداربووانی گردبوونەوەكە داواشیانكرد، بەهۆی زیادبوونی داهاتەوە، حكومەت موچە بەبێ لێبڕین دابەشبكات، ئەنجومەنی پارێزگای سلێمانیش سنوورێك بۆ گرانیی بازاڕ دابنێت.
