بڕیارە ئەمڕۆ ئەنجومەنی وەزیرانی هەرێمی كوردستان كۆبوونەوەی ئاسایی هەفتانەی خۆی ئەنجامبدات، تیایدا هێرشەكانی سەر فڕۆكەخانەی هەولێر و ئامادەكردنی پرۆژەیاسای بودجەی هەرێم تاوتوێدەكرێن.
ئەمڕۆ چوارشەممە، ئەنجومەنی وەزیرانی ھەرێمی کوردستان، بە سەرۆکایەتیی مەسرور بارزانی، سەرۆکی حکومەتی ھەرێمی کوردستان و بە ئامادەبوونی قوباد تاڵەبانی، جێگری سەرۆکی حكومەت، کۆدەبێتەوە.
فەرمانگەی میدیا و زانیاریی ئەنجومەنی وەزیران بڵاویكردەوە، گرنگترین ئەو تەوەرانەی باسدەكرێن بریتین لە “خستنەڕووی دواپێشھاتەکانی بواری ئەمنی لە ھەرێمی کوردستان و ھێرشەکانی ئەمدواییەی سەر فڕۆکەخانەی نێودەوڵەتیی ھەولێر و ڕەوشی لێکۆڵینەوە و ھەڵوێستی نێودەوڵەتی لەوبارەیەوە”.
ھەروەھا خستنەڕووی ھێڵە گشتییەکانی ڕەشنووسی یەکەمی پڕۆژەیاسای بودجەی گشتیی ھەرێمی کوردستان بۆ ساڵی 2021 لە بوارەکانی داهات، خەرجی، قەرز و پابەندییە داراییەکان و کورتهێنان، تەوەرێكی دیكەی كۆبوونەوەكە دەبێت.
لەلایەكی دیكەوە، شەوی ڕابردوو وەزارەتی دارایی هەرێم لەبارەی لێبڕینی موچەی ئەم مانگە، ڕوونكردنەوەیەكی بڵاوكردەەوە و ڕایگەیاند، “بە ھەموولایەكی ڕادەگەیەنین، كە ئەو بابەتە ئەنجومەنی وەزیرانی ھەرێمی كوردستان بڕیاری لێدەدات، كە چەندی موچە تەمویل دەكرێت، لەسەر بنەمای داھاتی نەوتی و نانەوتی و دواتر وەزارەتی دارایی بڕیارەكە جێبەجێ دەكات”.
چاوەڕوان دەكرێت لە كۆبوونەوەی ئەمڕۆی ئەنجومەنی وەزیران، بڕیار لەبارەی بڕی لێبرینی موچەی ئەم مانگە بدرێت.
