پۆلیسی ڕاپەڕین ڕایگەیاندووە، بۆمبێك كە مێژووەكەی دەگەڕێتەوە بۆ سەردەمی شەڕی ئێران و عێراق بە ڕانە مەڕێكدا تەقیوەتەوە و شوانی مەڕەكانیش بریندار بووە.
لە ڕاگەیەندراوێكدا، پۆلیسی ڕاپەڕین ڕایگەیاندووە، “ئەمشەو 12ی نیسان، بریندارێک كە لەدایکبووی ساڵی 2001ە و پیشەی شوانە، دانیشتووی ناحییەی هێرۆ سەربە قەزای پشدەر (قەڵادزێ)یە، گەیەندرایە نەخۆشخانەی گشتیی”.
پۆلیسی ئەوەشی ئاشكراكردووە، “شوێنەواری برین بە جەستەیەوە هەیە”.
لە ڕاگەیەنداروەكەی پۆلیسی ڕاپەڕیندا هاتووە، “بە وتەی بریندارەكە خۆی، لە نزیک ناحییەکە بۆمبێکی سەردەمی شەڕی ئێران-عێراق بە ڕانە مەڕەکەیدا تەقیوەتەوە و پریشکێکی بۆمبەکەش بەر خۆی کەوتووە و بریندار بووە و 4 سەر مەڕیشی مردار بوونەتەوە”.
پاش ئەو ڕوداوە، مەفرەزەکانی بنکەی پۆلیسی ناحییەی هێرۆ گەیشتونەتە شوێنی تەقینەوەكە و دۆسییەی لێکۆڵینەوەیان بۆ ڕوداوەکە كردووەتەوە، وەك پۆلیس ئاشكرایكردووە.
