ئەندامێكی لیژنەی دارایی لە پەرلەمانی كوردستان رایدەگەیەنێت، ئەگەر پڕۆژەیاسای بودجە بەم میكانیزمەی ئێستا پەسەندبكرێت كە رێژەی 10%ی گەڕاندنەوەی پاشەكەوتی مووچە دانراوە لە ماوەی سێ ساڵدا كە یاسای بودجە ئامادەدەكرێت تەواوی مووچە پاشەكەوتكراوەكان دەگەڕێندرێتەوە.
عومەر گوڵپی ئەندامی لیژنەی دارایی لە پەرلەمانی كوردستان لە لێدوانێكدا بە تۆڕی میدیایی ئێستای راگەیاند، گەڕاندنەوەی پاشەكەوتی مووچە لە ئەستۆی حكومەتی هەرێمە، چونكە لە ماوەی رابردوودا حكومەتی هەرێم نەوتی فرۆشتووە و پێشتریش ئامادەنەبووە پاشەكەوتی مووچە بگەڕێنێتەوە.
راشیگەیاند، دیاریكردنی بڕگەیەك تایبەت بە گەڕاندنەوەی پاشەكەوتی مووچە لە یاسای بودجەی عێراقدا هەنگاوێكی باشە و ئەگەر بەم شێوازەی ئێستا یاسای بودجە پەسەندبكرێت كە گەڕاندنەوەی پاشەكەوتی مووچە بە رێژەی 10% دیاریكراوە دەتوانرێت لە ماوەی ئەو سێ ساڵە كە بۆ یاسای بودجە ئامادەدەكرێت تەواوی پاشەكەوتی مووچە بگەڕێندرێتەوە و حكومەتی هەرێمیش پابەنددەكات.
ئەو پەرلەمانتارە پێیووایە، “دەبووایە پێشتر حكومەتی هەرێم یاسای چاكسازی جێبەجێبكات كە بریتی بوو لە دروستكردنی هەژمارێكی بانكی بۆ مووچەخۆران و قەرزەكانی حكومەت لە قۆناغی یەكەمدا لە مووچە پاشەكەوتكراوەكان بدرێتەوە.
