لە ساڵڕۆژی كۆچی دوایی ئیبراهیم ئەحمەد، بافڵ تاڵەبانی ڕایگەیاندووە، “مامۆستا ئیبراھیم ئەحمەد پارتی دیموکراتی کردە حیزبێکی گەورە و کاریگەر لە كوردستان”.
لە ڕاگەیەندراوێكدا بافڵ تاڵەبانی، هاوسەرۆكی یەكێتیی نیشتمانیی كوردستان ئەمڕۆ پێنجشەممە 8ی نیسان، ڕایگەیاندووە، “ئەمڕۆ 21 ساڵ بەسەر کۆچی دوایی مامۆستای خەباتی سیاسی، کوردایەتی، ڕووناکبیری و ڕۆژنامەگەری، مامۆستا ئیبراھیم ئەحمەد تێپەڕدەبێت”.
بافڵ تاڵەبانی ئەوەشی خستوەتەڕوو، “مامۆستا ئیبراھیم ئەحمەد یەکێکە لە سیمبولەکانی سیاسەت، نیشتمانپەروەری، ڕۆشنبیری و ڕۆژنامەگەریی کوردستان لە سەدەی ڕابردوودا، سیاسییەکی بیرتیژ و دووربین، قەڵەمێکی پڕ لە ورە و ڕۆشنبیرێکی نوێخوازی میلەتەکەمان بوو، لەپێناو کوردستان و سەربەرزیی خەڵکەکەی دەژیا”.
هاوسەرۆكی یەكێتی ڕاشیگەیاندووە، “مامۆستا ئیبراهیم ئەحمەد لە ژیانی سیاسیی خۆیدا بڕوای بە بیری نەتەوەیی و نوێگەری هەبوو، هەر ئەمەش وایکرد کاتێک بە سکرتێری پارتی ھەڵبژێردرا، بناغەیەکی نوێی بۆ حیزبایەتی دانا و ڕۆحێکی نوێی بە جوڵانەوەی سیاسی و خەباتی کوردایەتی بەخشی، ئەو ڕۆحییەتە نەتەوەیی و نیشتمانپەروەرییەی مامۆستا ئیبراهیم ئەحمەد بووبوو بە هەوێنی سیاسەتی پارتی و وایکرد کۆمەڵانی خەڵک بەپیر ئەو حیزبەوە بچن و پێشوازی لێبکەن”.
“خەڵکی کوردستان بە ڕۆحێکی خۆنەویستی و شۆڕشگێڕانەوە پێشوازییان لە هەوڵەکانی مامۆستا دەکرد و وەک ڕابەرێکی نەتەوەیی و نیشتمانپەروەری تەماشایان دەکرد، ئەو بوو بیروبۆچوونە جیاوازەکانی کۆدەکردەوە و تۆوی نیشتمانپەروەری لە ڕێکخستنەکانی حیزب و دڵی خەڵکی کوردستاندا چاند و پارتی دیموکراتی کردە حیزبێکی گەورە و کاریگەر لە کوردستان”، وەك بافڵ تاڵەبانی وتویەتی.
ئاماژەی بەوەشكردووە، “ئەمڕۆ کە یادی ئەو ڕابەرە نەتەوەییەی کورد دەکەینەوە، لە ھەمووکات زیاتر پێویستمان بە خەبات و بیری نیشتمانی و نوێگەری مامۆستا ئیبراھیم ئەحمەدە بۆ سیاسەت و حوکمڕانی، پێویستمان بەو توانا بێسنوور و دونیابینی و رۆشنبیرییە فراوانەی ئەوە بۆ یەکخستنەوەی ھێز و تواناکان بۆ گەشەپێدانی رۆشنبیری لە ھەموو کایەکانی ژیان، بەڵێن دووپاتدەکەینەوە ئێمە بە ئەمانەتەوە درێژەی پێدەدەین و دەیبوژێنینەوە، بە شوێنپێی ئەودا دەڕۆین و وانەکانی دەکەینە چرای ژیانمان”.
