هەردوو وەزارەتی دارایی و پلاندانانی هەرێم كۆبوونەوە، لە كۆبوونەوەكەدا باس لە موچە و پرۆژەیاسای بودجەی گشتیی هەرێم كرا بۆ ساڵی 2021.
لە ڕاگەیەندراوێكدا، وەزارەتی پلاندانانی هەرێم ڕایگەیاندووە، ئەمڕۆ سێشەممە 6ی نیسان، بەسەرپەرشتیی دارا ڕەشید، وەزیری پلاندانان، هەردوو وەزارەتی پلاندانان و دارایی کۆبوونەوە.
لەو كۆبوونەوەیەدا، وەزیری پلاندانان ڕایگەیاندووە، “لە کۆبوونەوەی داهاتووی ئەنجومەنی وەزیران گفتوگۆ لەبارەی بودجەی هەرێمەوە دەکەین”.
هەریەك لە بریکاری وەزارەتی پلاندانان و بەرێوبەری گشتیی بودجە لە وەزارەتی داریی، ئامادەی كۆبوونەوەكە بوون، گفتوگۆ لەبارەی دوایین ئامادەکارییەکانی پرۆژەیاسای بودجەی هەرێم کرا.
بەگوێرەی ڕاگەیەندراوەكە، دارا ڕەشید، وەزیری پلاندانان ڕایگەیاندووە، “هەموو هەوڵێکی حکومەت بۆ دابینکردنی موچە و باشکردنی باروژیانی هاوڵاتییانە و لەژێر ئەو ڕۆشنایە ئامادەکارییەکانی بودجەی هەرێم کاری لەسەر کراوە”.
وەزیری پلاندانان داواشیکردووە، “پەلە بکرێت لە خستنەڕووی پێشنیار و تێبینییەکان بۆ ئەوەی لە کۆبوونەوەی داهاتووی ئەنجومەنی وەزیران گفتوگۆی لەسەر بکرێت”.
