بەهۆی لافاو و ڕۆچوونی ڕێگاوبانەكانەوە، لە ئیندۆنیزیا 157 كەس گیانیان لەدەستدا، دەیان كەسیش بێ سەروشوێن بوون.
ئاژانسە جیهانییەكانی هەواڵ ئەمڕۆ سێشەممە 6ی نیسان بڵاویان كردووەتەوە، بەهۆی گەردەلولی “سێرۆجا”وە لە ئیندۆنیزیا لافاوێكی زۆر و ڕۆچوونی زەوری ڕویداوە و بووەتەهۆی كوشتنی 157 كەس.
سەنتەری بەڕێوەبردنی قەیرانەكانی ئیندۆنیزیا ئاشكرایكردووە، 130 لەو كەسانەی گیانیان لەدەستداوە لە چەند دوورگەیەكی وڵاتەكە بوون و ئەوی دیكەیان لە ناوچەی ڕۆژهەڵاتی تەیمور بوون.
تیمەكانی فریاگوزاری بەدوای ئەو كەسانەدا دەگەڕێن كە بێسەروشوێن بوون، ژمارەیان زیاترە لە 70 كەس.
گەردەلولەكە هێندە بەهێزە بووە، چەندین خانو و ڕێگاوبانی وێران كردووە و داری لە ڕەگەوە هەڵكێشاوە، دەیان هەزار كەس ئاوارەبوون.
