بەیانی ئەمڕۆ لە ناحیەی شۆڕشی سەر بە قەزای چەمچەماڵ شەڕ لە نێوان دوو دراوسێدا دروستبوو، بەهۆیەوە کەسێک کوژرا و کەسێکی دیکە برینداربوو.
حاکم سەروەر، بەڕێوبەری ناحیەی شۆڕش، بە تۆڕی میدیایی ئێستای ڕاگەیاند، “شەڕ لە نێوان دوو دراوسێدا لە ناحیەی شۆڕش دروست بووە، بەداخەوە کەسێک کوژراوە و برینداریش هەیە، ئێستاش شەڕەکە لەلایەن ئاسایشەوە کۆنترۆڵکراوە و لێکۆڵینەوە دەستیپێکردووە”.
بەپێی زانیارییەکان ئەو کەسەی کوژراوە تەمەنی 50 ساڵە و دوای گەیاندی بە نەخۆشخانە گیانی لە دەستداوە.
ئەگەرچی تا ئێستا هێزە ئەمنییەکان لێدوانی فەرمیان لەسەر هۆکاری دروستبوونی شەڕەکە نەداوە، بەڵام بەشێک لە شایەتحاڵانی ڕوداوەکە دەڵێن، بەهۆی شەڕی منداڵانەوە دروست بووە.
