ئەمڕۆ 3ی نیسان لە مێرگەپان لە سلێمانی بافڵ تاڵەبانی و لاهور شێخ جەنگی، هاوسەرۆکانی یەکێتی نیشتمانی کوردستان و قوباد تاڵەبانی، جێگری سەرۆکوەزیرانی هەرێم و بەرهەم ساڵح کۆبوونەوە و لە کۆبوونەوەکەدا جەختکراوەتەوە لەسەر پابەندبوون بە یاسای بودجەوە.
لە ڕاگەیەندراوی دوای کۆبوونەوەکەدا ئاماژە بەوەکراوە، “یەکێتی نیشتمانی کوردستان سوپاسی بەرهەم ساڵح، سەرۆککۆماری عێراقی کردووە لە پرسی پەسەندکردنی بودجە و جێگیرکردنی پشکی کورد لە یاساکەدا”.
لە کۆبوونەوەکەدا جەختکراوەتەوە کە پەسەندکردنی بودجە هەنگاوێکی گرنگە بە ئاراستەی باشترکردنی ژیان و گوزەرانی خەڵک و کۆتایی هێنان بە لێبڕینی موچەی موچەخۆرانی هەرێم و بوژاندنەوەی کەرتی ئابوری.
هەروەها دوپاتی ئەوەکراوەتەوە کە پابەندبوون بە یاسای بودجە دەبێتە مایەی سەقامگیری ئابوری و کۆتایی هێنان بەو کێشە داراییانەی کە ماوەیەکی زۆرە بەرۆکی خەڵک و موچەخۆرانی گرتووە.
