حکومەتی تورکیا بە واژووی ئەردۆغان لە ڕێکەوتنامەی “ڕێگری لە توندوتیژی دژی ژنان و توندوتیژی خێزانی” هاتە دەرەوە.
دەرچوونی تورکیا لە ڕێکەوتنی نێودەوڵەتی شورای ئەوروپا یان Conventionی ئەوروپا بە واژووی ڕەجەب تەیب ئەردۆغان، سەرۆککۆماری تورکیا کۆتایی هاتووە و تا ئێستا هۆکارێکی ڕون لەو بارەیەوە ڕانەگەیەندراوە.
زوهرا زەمرد سلجوق، وەزیری کاروباری خێزان لەو بارەیەوە ڕایگەیاندووە، “دەرچوونی تورکیا لە ڕێکەوتنامەکە هیچ لە دۆخی ژنان و خێزانەکانی تورکیا ناگۆڕێت، چونکە یاسای بنەڕەتی لە تورکیا مافی ژن و خێزانی دەستەبەر کردووە”.
تورکیا 10 ساڵ پێش ئێستا ئەو ڕێکەوتنامەیەی واژوو کردبوو، کە ئەوکات ڕایگەیاندبوو دەستکەوتێکی گرنگە بۆ خێزان و ژنانی تورکیا.
توندوتیژی خێزانی و توندوتیژی دژ بە ژنان یەکێکە لە کێشە گەورەکانی تورکیا و ڕەجەب تەیب ئەردۆغان چەندینجار خودی خۆی ناڕەزایەتی دەربڕییوە و بەڵێنی ڕیشەکێشی کێشەکەی داوە.
ڕێککەوتنی نێودەوڵەتی ئیستەنبول لە ساڵی 2011 دا لەلایەن چەندین وڵاتەوە واژوو کرا کە وڵاتانی ئەندام پەیوەست دەکات بە گرتنەبەری یاسایی دژی ئەو کەسانەی توندوتیژی دژی ژنان و منداڵان دەکەن و ڕێگری دەکات لە دەستدرێژی سێکسی و خەتەنەی کچان.
